ህዝቡ በድምፁ ለልማት ስራዎቻችን የሰጠውን ይሁንታ አጠናክረን እናስቀጥላለን

ለአንድ ሀገር እድገት የዜጎች ቀጥተኛ ተሳትፎ ያለው ድርሻ ከፍተኛ ነው፡፡ ዜጎች በሀገራቸው ማህበራዊ ኢኮኖሚያዊና ፖለቲካዊ ጉዳዮች ላይ የሚጫወቱት ሚና ለሀገሪቱ እድገት ወሳኝ ነው፡፡

ያለ ሕዝብ ተሳትፎ የሚመራ ልማት የተሟላ ሊሆነ አይችልም፡፡ በህዝቦች ፍላጎትና ተሳትፎ በፀደቀ ህገ መንግስትና ዲሞክራሲያዊ ስርአት በሚመሩ ሀገሮች ሕዝቦች ለሀገራቸው ልማት እና እድገት ይበጃሉ ያሉዋቸውን ተወካዮቻቸውን በዴሞክራሲያዊ መንገድ በመምረጥ የስልጣን ምንጭ ይሆናሉ፡፡ ተወካዮቻቸውም ይሁንታውን ለሰጣቸው ህዝብ ደህንነት፣ማህበራዊና ኢኮኖሚያዊ እድገት እንዲሁም ሰብአዊ መብቶችና ፍላጎቶች መሟላት የሚጠበቅባቸውን ኃላፊነት ይወጣሉ፡፡ ይህን ኃላፊነታቸውን በአግባቡ ካልተወጡ የስልጣን ባለቤት የሆነው ሕዝብ ውክልናቸውን የሚነጥቅበት ሂደት ይፈጠራል፡፡

ሀገራችን ኢትዮጵያም በጭቁን ብሔር ብሔረሰቦች ተጋድሎ በተጎናፀፈችው ዴሞክራሲያዊ ስርአት አማካኝነት የህዝቡን ሉአላዊ የስልጣን ባለቤትነት የሚያረጋግጥ ዴሞክራሲያዊ ምርጫ ማድረግ ከጀመረች ዋል አደር ብላለች፡፡

የሀገራችን ብሔር ብሔረሰቦች ባቀረቡትና ባፀደቁት ህገ መንግስታዊ ስርአት አማካኝነት ቋንቋ ባህልና ማንነታቸው ተከብሮ ለሀገራቸው እድገት በቁርጠኝነት መስራት ከጀመሩ ሁለት አስርተ አመታት ተቆጥረዋል፡፡

የሀገራችን ሕዝቦችም በቀጥተኛ ተሳትፎአቸው ይሁንታን በሰጧቸው መሪዎቻቸው አማካኝነት በልማት እና በእድገት ጎዳና ላይ ግስጋሴያቸውን አፋጥነዋል፡፡

ባለፉት አራት ሀገር አቀፍ ምርጫዎች መላው የሀገራችን ህዝቦች ሙሉ ተሳትፎ በማድረግ በዲሞክራሲያዊ መንገድ መሪዎቻቸውን መምረጥ ችለዋል፡፡ በመረጡዋቸው ተወካዮቻቸው

አማካኘነት የሀገራቸውን ህዳሴ የሚያረጋግጡ የልማት ስራዎችን በስፋት እያካሔዱ ይገኛሉ፡፡

ሀገራችን ኢትዮጵያ ባሳለፍነው የሚያዚያ ወርም የከተማ አስተዳደር እና የአካባቢ ምርጫን እንደ ከዚህ በፊቱ ሁሉ የአለም አቀፍ የምርጫ መስፈርቶችን ባሟላ መልኩ በማካሔድ በተሳካ ሁኔታ ማጠናቀቅ ችላለች፡፡

በዚህ ምርጫም የከተማችን አዲስ አበባ ነዋሪዎችም የጀመሯቸው የልማት እና የእድገት ጉዞዎችን ያስቀጥላሉ፣የህብረተሰቡን ማህበራዊና ኢኮኖሚያዊ ጥያቄዎች በተሟላ መልኩ ይፈታሉ ብለው ያመኑባቸውን መሪዎቻቸውን በነፃነት እና በሙሉ ፍቃዳቸው መምረጥ ችለዋል፡፡

በዚህም የአዲስ አበባ አስተዳደር ከከተማ እስከ ወረዳ ባሉ የምርጫ ጣቢያዎች ሙሉ በሙሉ በሚባል ደረጃ በኢትዮጵያ ህዝቦች አብዮታዊ ዲሞክራሲያዊ ግንባር /ኢህአዴግ/ አሸናፊነት ሊደመደም ችሏል፡፡

ይህም አስተዳደሩ ከህዝቡ ጋር ሲያደርግ የቆየው የልማት እንቅስቃሴ በህብረተሰቡ ዘንድ ያገኘው ተቀባይነት ከፍተኛ መሆኑን ያሳየ ነው፡፡ ህዝቡም ለከተማዋ እድገትና ልማት ከኢህአዴግ ጋር የበለጠ በመስራት የተሻለ ውጤት ለማስመዝገብ ያለውን ቁርጠኝነት በምርጫው አሳይቷል፡፡

በድርጅታችን ኢህአዴግ መሪነት የአዲስ አበባ አስተዳደር ባለፉት አመታት የከተማዋን ማህበራዊና ኢኮኖሚያዊ ችግሮች ለመፍታት በተለይም በጥቃቅንና አንሰተኛ በመቶ ሺዎች ለሚቆጠሩ ዜጎች የስራ ዕድል በመክፈት ለራሳቸውና ለሀገራቸው እድገት የበኩላቸውን አስተዋጽኦ እንዲያበረክቱ አስችሏል፡፡

አስተዳደሩ የከተማዋን የንግድ እንቅስቃሴ ስርአት በማስያዝ በኩል ያከናወናቸው ተግባራት ተስፋ ሰጪ ውጤት ማስመዝገባቸው በከተማዋ የሚስተዋለውን የኑሮ ውድነት ለማስተካከል እና የዋጋ ንረትን ለማርገብ የወሰዳቸው እርምጃዎች ትርጉም ያለው ውጤት ማስመዝገባቸው በህብረተሰቡ ዘንድ ግንዛቤ ማግኘቱ ነዋሪው ለሰጠን ቀጣይ ኃላፊነት ዋና ምክንያቶች ናቸው፡፡

በማህበራዊ ጉዳዮችም በተለይም ጥራት ያለው ትምህርትን ለሁሉም ዜጎች በማድረስ ረገድ የተሰሩ ስራዎች፣ በጤና ኤክስቴንሽን የተመዘገቡ ለውጦች፣ በንፁህ የመጠጥ ውሃ አቅርቦት ረገድ የተጀመሩ ስራዎች እና በአካባቢ ውበትና ፅዳት እየተደረጉ ያሉ ጥረቶች በህብረተሰቡ ዘንድ ተቀባይነት ማግኘታቸውን ያሳያል፡፡

ይህም ቢሆን ግን ገና ብዙ ቀሪ ሥራዎች እንዳሉብን ህብረተሰቡ በተለያዩ መንገዶች ገልጿል፡፡ በተለይም መልካም አስተዳደር ከማስፈን አኳያ በተለይ ከቅርብ ጊዜ ወዲህ ከህዝቡ ጋር በመምከር የተጀማመሩ ስራዎች ቢኖሩም በተሟላ መልኩ መስራት እንደሚጠበቅብን እንረዳለን፡፡ የከተማችንን ልማትና እድገት ከማፋጠን ጐን ለጐን ለህብረተሰቡ ፈጣንና ግልፅ አገልግሎት መስጠት እንደሚገባን እንገነዘባለን፡፡

በተለያዩ ዘመናት በተቆለሉባት ዘርፈ ሰፊ ችግሮች ምክንያት አሮጌና ጐስቋላ የሆነችውን ከተማችንን መልሶ በማልማት ውብና ፅዱ ለማድረግ የተሰሩ ስራዎች ውጤት ማስመዝገብ መጀመራቸውን እንረዳለን፡፡

የከተማዋን መሠረተ ልማት በማሻሻል በተለይም አዳዲስ የባቡር መስመሮችን ጨምሮ ዘመናዊ እና ውብ የመንገድ ስራዎቻችን የሕብረተሰቡን ድጋፍ ማትረፋቸው የአደባባይ ሀቅ ነው፡፡

የከተማዋን የመኖሪያ ቤት ችገር ለመፍታትም ከ8ዐ ሺህ በላይ የሚሆኑ የጋራ መኖሪያ ቤቶችን በመገንባት ለህብረተሰቡ ማከፋፈል ተችሏል፡፡ በአሁኑ ወቅትም ከ95 ሺህ በላይ የሚሆኑ የመኖሪያ ቤቶችን በመገንባት ላይ ይገኛል፡፡ በዚህ መርሃ ግብር ከግማሽ ሚሊየን የሚለቁ ዜጐች የመኖሪያ ቤት ችግሮቻቸውን መፍታት ተችሏል፡፡

በአሁኑ ወቅትም አስተዳደሩ የጀመረውን የመኖሪያ ቤት እጥረት ችግርን ለመፍታት ከፍተኛ በጀት በመመደብ በተለያየ የኑሮ ደረጃ ላይ የሚገኙ ነዋሪዎችን ማስተናገድ የሚችሉ ልዩ ልዩ አይነትና መጠን ያላቸውን የመኖሪያ ቤቶች በመገንባት የነዋሪውን ጥያቄ ለመፍታት በመስራት ላይ ይገኛል፡፡

ለዚህም ነው የመኖሪያ ቤት ጥያቄ ለሚያቀርቡ እና ከዚህ ቀደም በተካሔዱ ምዝገባዎች ያልተመዘገቡ አዲስ ተመዝጋቢዎችን እና በመጀመሪያ ዙር ምዝገባ ተመዝግበው እጣ ያልደረሳቸውን በአዲስ መልክ በመመዝገብ የመኖሪያ ቤት ችግሮቻቸውን ለመፍታት አስተዳደሩ መነሳቱን ያስታወቀው፡፡

ባሳለፍነው ሳምንት መጨረሻ በክቡር ከንቲባው አማካኝነት የተላለፈው የአዲስ የመኖሪያ ቤት ምዝገባ እድል የከተማችን ነዋሪ በአግባቡ በመጠቀም ለመዲናችን ማህበራዊና ኢኮኖሚያዊ እድገት የተያያዘውን ትግል አጠናክረን እንቀጥላለን፡፡

በአዲስ የመኖሪያ ቤት ምዝገባ ከዚህ ቀደም የተመዘገቡም ሆኑ አዲስ ተመዝጋቢዎች የሚካተቱ ሲሆን በተለያየ ቅርፅ በተዘጋጀው የመኖሪያ ቤት ግንባታ መርሃ ግብር ተሳታፊ በመሆን ሕብረተሰቡ የከተማው አስተዳደር ለጀመረው የልማት እንቅስቃሴ እንደከዚህ በፊቱ ሁሉ ግንባር ቀደም ተዋናይ እንዲሆን በዚህ አጋጣሚ ጥሪያችንን እናስተላልፋለን፡፡

የከተማዋ አስተዳደር ህዝቡ በምርጫው ለሰጠው ቀጣይ ኃላፊነት የተሰማውን ታላቅ አክብሮት እየገለፀ የጀመራቸውን የልማትና የእድገት እንቅስቃሴዎችን በማጠናከር መዲናችን የአፍሪካና የአለም ዲኘሎማቶች ቀዳሚ ምርጫ እንደሆነች እንድትቀጥል የሚያደርገውን ጥረት አጠናክሮ እንደሚቀጥል መግለፅ ይወዳል፡፡

የከተማችንም ነዋሪዎች እንደ ከዚህ በፊቱ ሁሉ ከአስተዳደሩ ጎን በመሰለፍ የመዲናዋን ማህበራዊ ኢኮኖሚያዊ ጥያቄዎች ከስሩ በመፍታት ከተማችን ውብ፣ ምቹና ለኑሮ ተስማሚ የማድረግ ስራችንን አጎልብተን እንድንቀጥል ጥሪያችንን እናስተላልፋለን፡፡

            የአዲስ አበባ ከተማ አስተዳደር

በማህበራዊ፣ኢኮኖሚያዊና መልካም አስተደደር ሥራዎች እስካሁን የተገኘውን ውጤት የበለጠ ለማጠናከር በጋራ እንስራ

የአዲስ አበባ ከተማ አስተዳደር በ2ዐዐ5 በጀት ዓመት ሕዝቡን የልማትና መልካም አስተዳደር ውጤቶች ተጠቃሚ ለማድረግ በታቀደው እቅድ መሠረት ባለፉት 9 ወራት የተሰሩ ሥራዎችን ገምግሟል፡፡

 የከተማው አስተእደር የበጀት ዓመቱ እቅድና የባለፉትን 4 ዓመታት እቅድ አፈፃፀም ትምህርት በመውሰድ፣ የህዝቡን ዋነኛ የልማትና መልካም አስተዳደር ፍላጐትና ጥያቄዎች መሠረት በማድረግና የከተማዋን የወደፊት ራዕይ ለማሳካት፣ አለም አቀፍና አህጉራዊ ሚናዋን የምትወጣበትን አቅም ለመፍጠር የሚያስችል ሆኖ የተዘጋጀ ነበር፡፡

 በዚህም መሠረት የመንገድ፣ የመኖሪያ ቤትና፣ ማህበራዊ አገልግሎት ሰጪ ተቋማት ልማት ሥራዎች ተከናውነዋል፡፡ ዋነኛ ችግር የሆነውን ሥራ አጥነትና የኑሮ ውድነት ለማቃለል በተለያዩ የጥቃቅንና አነስተኛ ዘርፎች የሥራ ዕድል ተፈጥሯል፡፡ አስተዳደሩ በአምስት ዓመት የስልጣን ዘመኑ ልዩ ትኩረት ሰጥቶት የነበረው የመልካም አስተደደር እና የተለያዩ የአገልግሎት አሰጣጥ ችግሮችን የመፍታት እቅድ በዚህ የእቅድ ዘመንም በልዮ ትኩረት ሲሰራባቸው ቆይቷል፡፡ ህዝቡ ቀደም ሲል እንደነበረው የልማት ሥራዎች የዳር ተመልካች ሳይሆን በቀጥታ በመሳተፍ ጥቅሙንም በዚያው ልክ የሚያረጋግጥበት እቅድም ተግባራዊ ሆኗል፡፡ የእነዚህ ሁሉ የበጀት ዓመቱ ሥራዎች እቅድ አፈፃፀምም በህዝቡ በራሱም እየተገመገሙ የተከናወኑ በመሆኑ ውጤት ተገኝቶባቸዋል፡፡

 ባለፋት 9 ወራት ዋነኛ እቅድ በነበረው ለከተማዋ ነዋሪዎች የሥራ እድል የመፍጠርና በዚሁም የኑሮ ውድነትን የመቀነስ ተግባር ከ165 ሺህ ለሚበልጡ የከተማዋ ነዋሪዎች በተለያዩ ዘርፎች የሥራ ዕድል ተፈጥሯል፡፡

በጋራ መኖሪያ ቤቶች ልማት በዓመቱ ከ95 ሺህ በላይ ቤቶችን ግንባታ ለመጀመርና ከ36 ሺህ በላይ ቤቶችን ለተጠቃሚዎች ለማስተላለፍ በታቀደው መሠረት ባለፈው ዓመት የተጀመሩትን ጨምሮ የቤቶቹ ግንባታ በመፋጠን ላይ ነው፡፡ ለተጠቃሚዎች ለማስተላለፍ የተያዘው እቅድም በሁለት ዙሮች ከ2ዐ ሺህ የሚበልጡ ቤቶችን በማስተላለፍ በአጠቃላይ ከ1996 ዓ/ም ጀምሮ እስካሁን ከ11ዐ ሺህ በላይ ሰዎችን የቤት ባለቤትና በአማካኝ ከ55ዐ ሺህ በላይ ቤተሰቦችን ደግሞ የቤት ልማቱ ቀጥተኛ ተጠቃሚ ማድረግ ተችሏል፡፡

በመንገድ ልማት የቀላል ባቡር ኘሮጀክትን ጨምሮ ሰፋፊ የመንገዶች ኘሮጀክቶች በተያዘላቸው እቅድ መሠረት እንዲጠናቀቁ እየተደረገ ሲሆን የመንገዶቹን የጥራት ደረጃ ለማሳደግም እየተሰራ ነው፡፡ 

የጤናና የትምህርት አገልግሎቶችን ጥራት ለማሳደግ ተደራሽና ቀልጣፋ ለማድረግም በርካታ ሥራዎች ተሰርተዋል፡፡ እነዚህና ሌሎች ህዝቡን በቀጥታና በተዘዋዋሪ ተጠቃሚ የሚያደርጉና የከተማዋን እድገት የሚያፋጥኑ የልማት ሥራዎች ባለፉት 9 ወራት የተከናወኑ ሲሆን ከዚህም ጐን ለጐን ለበርካታ ጊዜያት በተገልጋዮችና ነዋሪዎች ቅሬታ ይቀርብባቸው የነበሩ ጉዳዮችን በክትትልና ቁጥጥር ስርዓትና በህዝቡም በራሱ ጥያቄ በመለየት ምላሽ እንዲሰጣቸው ተደርጓል፡፡ እስከ አሁን ድረስ ምላሽ ባላገኙ ጉዳዮች ላይ ቀጣይ ምላሽ በመስጠት የህዝብን ተጠቃሚነት ለማረጋገጥ አስተዳደሩ አቋም ይዞ እየሠራ ይገኛል፡፡

በቀጣዮቹ የበጀት ዓመቱ 3 ወራትም ቀሪውን የዘመኑን እቅድ ለማጠናቀቅ ያለአግባብ መጥቀምና መጠቀም አመለካከትና ድርጊቶችን ለመግታትና የአመራሩንና የሠራተኛውን  

አቅም በማጠናከር ህዝቡን ይበልጥ ለማገልገልና ለከተማዋ ሁለንተናዊ እድገት ይበልጥ መስራት እንደሚገባ ታምኖበታል፡፡

በየዘርፉ ያለ የአመራር፣ ያለአግባብ መጥቀምና መጠቀም፣ የህዝብ አገልጋይነት አለመኖር ችግሮችን ለመፍታት በአዲስ አበባ ከተማ አስተዳደር ሁሉም መዋቅሮች ያሉ አመራርና ሠራተኞች በበለጠ ቅንጅት እንዲሰሩ ይደረጋል፡፡

የአዲስ አበባ ከተማ አስተዳደር እነዚህን ሥራዎች ይበልጥ በማጠናከር ህዝቡን ተጠቃሚ ለማድረግና የከተማዋን እድገት ለማፋጠን እንደሚሰራ እየገለፀ የከተማዋ ነዋሪዎች በተለያየ መዋቅር የሚሰሩ አመራርና ሠራተኞች ባለሃብቶችና ሁሉም አካላት ከአስተዳደሩ ጋር በጋራ እንዲሰሩ ጥሪውን ያቀርባል፡፡

                              የአዲስ አበባ ከተማ አስተዳደር